移至主內容

敢至係 Marketing

敢至係 marketing

 

我知道。我寫緊一篇 99.9% marketing 人都會笑戇 X 嘅 FF 文,但既然諗得出,就唔怕寫埋佢啦。況且我死線又到,要交稿。 

 

呢排陸續收到客戶朋友 call,見勢色唔對想 hold hold 啲 campaign。當外圍唔明朗,停一停諗一諗係好正確嘅決定。不過 marketing 最好玩嘅地方,係無定「慄」。喺好驚嘅時候,你絕對有權去選擇驚、少少驚、唔驚,又甚至懶 L 得驚。好似啲股評人成日講,人人去馬你應該縮,人人龜縮你應該衝。縮定衝,視乎你點睇。 

 

我屎忽發奇想,有冇品牌夠膽揀呢個時候做嘢?成日話想做 young 啲,想 touch 到啲學生,有無 marketing 高手有吉屎配合個運動推個 campaign? 

 

戴返個頭盔先,我唔係要騎劫今次嘅運動,以下廢噏純粹從營銷立場出發,與本人立場無關 🙏🏻。 

 

FF01 
某飲用水品牌,趁機喺維園至金鐘嘅遊行路段,甚至係添美道龍和道同立法會附近擺設大量加水機。唔知點解部水機會喺重要日子變成免費,而正義嘅送水大佬,就算封晒路都每日堅持到現場幫部機 refill。正所謂飲又得,需要時洗吓對眼又得,得咗。 

 

FF02 
某某便利店於遊行翌日推出雨傘舊換新計劃,所有舊遮爛遮都可以免費換過把新嘅,確保人人有遮用。同場加映大意貨車司機喺濕滑嘅龍和道,發生好輕微意外,事後司機不顧而去,現場遺留大批簇新便利雨傘散落一地…… 

 

FF03 
某某某大型個人護理連鎖店喺遊行日宣佈,當日遊行路線沿途嘅十幾間分店都會免費提供濕紙巾、口罩同防曬用品,務求窩心照顧遊行人士嘅護理需要。仲歡迎稍有不適嘅人士進入店內抖抖先,專業藥劑師會按情況提供協助。 

 

如果真係有 brand 肯 / 敢做,一定贏到年輕人嘅尊重同支持。注意返,唔係我想得這麼理想。危同機從來都係同年同月同日生,係銅板嘅兩面。遠嘅唔講,我記得沙士嘅時候,真係做乜都輸,保守就係常識。但當時偏偏有批二三線保健品出手,人唔做我做乘機霸地盤。當日佢哋喺某地點免費派嘅 Vitamin C,而家已經坐正喺連鎖店貨架正中,而且品牌 SKU 越出越多,你就知當日搏嗰一鋪,贏得幾大。 

 

事實上今次嘅事件,有唔少品牌都唔覺意贏咗民心,好似開咪叫大家加油嘅地鐵車長、弱勢媒體嘅記者哽咽現場直播、電台 DJ 開咪講人話等等。佢哋贏嘅 KPI,好多出盡力谷 media 嘅 campaign 都望塵莫及。 

 

我知道,香港人嘅集體良心,係唔應該被商業嘅居心污染。我只係想問,喺大是大非同在商言商之間,可唔可以互相推動?有良心嘅品牌管理,亦可以喺適當時候,做返件對香港好,對自己又好嘅事,啱唔啱?

 

香港人、香港品牌一齊加油啦! 

 

[後記]
話口未完,本文排隊出街之際,寶礦力搶先出手抽起 TVB 啲 spot,成班本地知名插畫師都出嚟撐,免費幫佢畫靚圖狂 po。啱喇,唔好比佢停!

 

和理基
舊廣告人